Албанските власти започнаа голема акција против организираниот криминал, откако беа издадени налози за апсење на 10 лица осомничени дека стојат зад една од најголемите нарко-мрежи во регионот. Според истрагата, групата во периодот од 2019 до 2021 година организирала транспорт на огромни количини кокаин од Латинска Америка кон европските пазари.
Според Специјалното обвинителство за борба против корупција и организиран криминал, организацијата функционирала на повеќе континенти, координирајќи сложени шеми за шверц на дрога и перење пари преку легални бизниси и инвестиции во недвижности.
Специјалниот суд одобрил притвор за десетмина албански државјани, меѓу кои и лица кои важат за клучни фигури во криминалната структура. Истражителите ги поврзуваат со неколку големи меѓународни операции за транспорт на кокаин.
Во текот на истрагата биле документирани повеќе големи заплени. Во белгиското пристаниште Антверпен биле откриени околу 700 килограми кокаин скриени во контејнер со возила и резервни делови. Дополнително, во еквадорскиот град Гвајакил биле пресретнати над два тони кокаин наменети за холандскиот пазар.
Обвинителите ја поврзуваат групата и со други големи заплени во Холандија, меѓу кои и пратки од над еден тон и повеќе од четири тони кокаин. Во 2021 година, според истрагата, бил спречен уште еден обид за транспорт на повеќе од еден тон дрога од Колумбија кон Франција.
Според проценките на обвинителството, криминалната организација за неколку години успеала да прошверцува најмалку 50 тони кокаин, што ја прави една од најголемите нарко-операции откриени во регионот.
Властите тврдат дека заработените милиони евра биле внесувани во Албанија во готовина, а потоа инвестирани во луксузни вили, хотели, атрактивно крајбрежно земјиште, градежни проекти и бројни компании.
Според истражителите, осомничените користеле сложени механизми за прикривање на потеклото на парите. Меѓу методите биле фиктивни купопродажби, подизведувачки компании и трансакции преку поврзани фирми, со цел нелегално стекнатите средства да изгледаат како законски приходи.
Истрагата продолжува, а властите најавуваат дополнителни финансиски проверки и можни нови апсења поврзани со мрежата која, според обвинителите, со години функционирала меѓу Латинска Америка и Европа.
