Минатата вечер улиците на Белград, Ниш и Нови Сад беа сведоци на голема напнатост и немири. Полицијата употреби груба сила против мирните демонстранти, меѓу кои беа студенти, средношколци и професори, кои преку блокади изразуваа граѓанска непослушност.
Во Белград беше забележан голем број апсења — околу 40 студенти, пет ученици и неколку професори се приведени, а припадници на жандармеријата направија обид да влезат во зградата на Правниот факултет. Слични акции се случија и во Нови Сад.
Полицијата ја засили својата активност само неколку часа откако Вишото јавно обвинителство во Белград објави дека сообраќајните блокади се нелегални според Уставот и законите на Србија и дека властите имаат право да реагираат. Студентите, од своја страна, најавија дека утрешната протестна акција, планирана за 7:30 часот, е одложена, но порачаа дека наскоро ќе имаат нови објави.
