Несреќната Алдина Јахиќ, во обид да се спаси од нејзиниот убиец Анис Калајџиќ, истрчала од фитнес-центарот кон блискиот хотел. Додека трчала, таа повикала: „Има пиштол, има пиштол!“, што го потврди еден од таксистите кој бил на постојката кај автобуската станица.
Таксистот, заедно со двајца колеги, седел пред ресторан во близина на фитнес-центарот. Кога го слушнале нејзиниот плач, веднаш станале и се упатиле кон напаѓачот.
„Сè се случи за миг. Таа претрча покрај нас и кога ја слушнавме како зборува за пиштолот, веднаш станавме. Тој не избега. Неговиот автомобил беше паркиран покрај рампата, која беше подигната. Кога нè виде, влезе во автомобилот. Не брзаше, не трчаше – изгледаше мртов ладен. Можеби се однесуваше така бидејќи не му беше гајле. Често доаѓаше тука во обложувалницата, бидејќи работи на блиската бензинска пумпа“, рече таксистот, кој побарал да остане анонимен.
Тој истакна дека никој не трчал по несреќната Алдина: „Верувајте ми, сè се случи за секунди. Немаше многу луѓе, можеби десетина, а некои објекти не работат дури ни во недела. Да не бевме тука, можеби ќе трчаше по неа. Вака, тој влезе во колата и тргна по патот во нејзина насока. Кога влезе, се обидов да ги запомнам регистарските таблички и веднаш да ја повикам полицијата.“
Таксистот откри дека и покрај полициските сирени, тие не можеле да поверуваат дека девојката е убиена: „Ужасно, не можеше да биде пострашно. Синоќа се зборуваше многу дека пукање имало тука, но тоа ќе го слушневме. Од местото каде бевме, не можевме да видиме што се случува пред фитнес-центарот, но има видео надзор кој полицијата го заплени. Сè е видливо. Девојката тренирала околу 18 часот, а тој чекал таму. Претпоставувам таму извадил пиштол, по што таа избегала.“
Овој сведок ја опиша сцена која ќе остане трајно запаметена како една од најтрагичните во последните години.
