На денешен ден, пред точно 45 години, почина доживотниот претседател на Социјалистичка Федеративна Република Југославија – Јосип Броз Тито (1892–1980).
Тито беше еден од највлијателните политички и воени лидери на Балканот во 20. век. Од 1941 до 1945 година ја предводеше борбата против фашистичкиот окупатор, а по Втората светска војна остана на чело на државата и на Комунистичката партија. Тој беше и еден од основачите на Движењето на неврзаните, обединувајќи земји од различни континенти кои не припаѓаа на ниту еден од големите геополитички блокови – НАТО или Варшавскиот договор.
Мислењата за Тито и денес се поделени. За едни, тој е симбол на социјална правда, стабилност и меѓународен углед на Југославија. За други, пак, останува запаметен како авторитарен лидер кој жестоко се пресметувал со опозицијата.
Јосип Броз Тито почина на 4 мај 1980 година во Клиничкиот центар во Љубљана. Погребан е во Куќата на цвеќето на Дедиње во Белград. На неговиот погреб присуствуваа повеќе од 200 државници и познати личности од целиот свет. И ден-денес, многу луѓе од поранешните југословенски републики го посетуваат неговиот гроб, а Куќата на цвеќето досега ја имаат посетено над 20 милиони луѓе.
