Семејните малопродажни бизниси во Хрватска наскоро би можеле да работат во недела без досегашните строги ограничувања. Хрватското Министерство за економски развој најави измени во Законот за занаети, со кои семејните продавници би биле изземени од ограничувањето што моментално дозволува работа во недела само 16 недели годишно, согласно Законот за трговија.
Според најавениот план, ова ослободување ќе важи исклучиво за занаети со статус на семеен бизнис, односно продавници кои се во сопственост и управување на членови на едно семејство. Сепак, засега не е прецизирано како точно ќе се утврдува овој статус, ниту дали новите правила ќе важат и за семејни продавници кои имаат вработено лица надвор од семејството.
Хрватската занаетчиска комора позитивно реагираше на предлогот, нагласувајќи дека малите семејни продавници често се единствено место за снабдување во населбите, помалите градови и руралните средини. Од Комората посочуваат дека семејните бизниси не можат да се натпреваруваат со големите трговски синџири, а нивното опстојување најчесто зависи исклучиво од ангажманот на членовите на семејството.
Податоците укажуваат дека трговијата како занает бележи пад. Во декември 2025 година биле регистрирани 8.894 трговски занаети, што е за околу сто помалку во споредба со истиот период претходната година. Истовремено, вкупниот број на занаети во Хрватска продолжува да расте – во декември 2025 година биле регистрирани 133.640 занаети, што претставува раст од 8,6 проценти на годишно ниво и речиси 47 проценти повеќе во однос на 2020 година.
И покрај позитивните реакции, остануваат повеќе отворени прашања околу примената на новите правила. Сè уште не е јасно како ќе се третираат продавниците во туристичките области, каде дел од трговците веќе имаат посебен режим за работа во недела, ниту пак дали семејните занаети со надворешни вработени ќе можат да го користат ова ослободување. Очекувањата се дека повеќе детали ќе бидат познати во наредниот период, кога законските измени ќе влезат во подлабока процедура.
