Најскапиот квадратен метар во Србија годинава достигнал речиси 10.000 евра, а најголемата трансакција била стан на Белград на Вода продаден за 1,8 милиони евра. Ервин Пашановиќ, економист, објаснува дека пазарот на недвижности е во суштина слободен и се формира врз основа на понудата и побарувачката.
„Во последните 12 години имаме континуиран раст на цените и одлична ликвидност – поголемиот дел од становите се продаваат веднаш. Пазарот може да апсорбира сè што се нуди, а цената се формира врз основа на побарувачката“, вели Пашановиќ.
Но, зошто цените сега изгледаат астрономски? Според Пашановиќ, главните причини се:
- Недостиг на други инвестициони можности: Нема функционална берза, па целиот вишок капитал завршува во недвижности.
- Намалување на наталитетот: Помалку деца наследуваат од повеќе родители, што создава поголем капитал на располагање.
- Брз раст на кредитите: Сè повеќе млади се охрабруваат да купуваат станови преку поволни кредити.
„Ова е најбезбедната форма на инвестирање со највисок поврат на инвестицијата“, додава Пашановиќ.
Во Србија дури 90% од населението поседува некаква недвижност, а 98% се домашни граѓани. Странците се малку присутни на пазарот, но иницијативи како „златна виза“ можат да го променат тоа, со што странците би можеле да добијат престој преку купување имот.
На прашањето дали ваквите цени ја продлабочуваат разликата меѓу богатите и сиромашните, Пашановиќ објаснува дека „недвижностите се чуден индикатор, но сигурно Србија е меѓу трите најголеми европски нации што поседуваат недвижен имот, заедно со Чесите и Албанците“.
