Грчката влада официјално објави план за воведување микрочипови со цел следење и регистрирање на сите домашни животни во централизирана дигитална база на податоци. Оваа одлука доаѓа како директен одговор на големиот скандал со злоупотреба на земјоделските субвенции од Европската Унија, по што довербата во системот беше сериозно нарушена.
Според акциониот план доставен до Европската комисија, новиот систем ќе овозможи прецизна евиденција и контрола на секое животно во земјата. Додека системот не стане целосно функционален, грчките власти ќе го проверуваат бројот на грла преку фактурите за продажба на млеко и месо, како и преку евиденцијата за купување храна за животни, пренесува „Еурактив“.
Овој потег следи по откритието на Европското јавно обвинителство дека сточари на островот Крит пријавувале лажно зголемен број кози и овци, далеку над реалните капацитети на островот, за да добијат поголеми средства од Заедничката земјоделска политика (ЗЗП).
Податоците покажуваат драматичен скок во бројот на регистрирани животни во Грција – од 2,2 милиони во 2020 година на дури 7,8 милиони денес, што претставува неверојатни 45% од вкупниот добиток во земјата.
Во рамки на истиот план, владата се обврзува и на изработка на нова дигитална геопросторна мапа на земјата, како и на создавање алатка за проверка на сопственоста на земјоделските парцели, со цел целосна транспарентност и спречување на идни измами.
Меѓутоа, одлуката на властите не е пречекана мирно. Незадоволните земјоделци најавија големи протести во Атина на 11 ноември, обвинувајќи ја владата за недоволна реакција и за неправедно казнување на чесните земјоделци.
Истрагата за скандалот продолжува. Минатиот месец, 37 лица беа уапсени низ цела Грција, меѓу кои и лица осомничени за фалсификување на сопственост на земјиште и добиток за да извлечат европски пари. Според полициските проценки, во периодот од 2018 до 2022 година, осомничените прибавиле околу 20 милиони евра субвенции, од кои половината биле нелегално добиени.
Претресите беа изведени во координација меѓу грчката полиција и Европското јавно обвинителство (EPPO). Истражителите веќе утврдиле дека измамите се случувале најмалку од 2019 година, а меѓу осомничените има и владини претставници поврзани со агенцијата ОПЕКЕПЕ, институцијата задолжена за управување со земјоделските субвенции, која годишно распределува околу 2,5 милијарди евра европска помош.
Со воведувањето на микрочиповите и новиот дигитален систем, Грција се надева дека ќе ја врати довербата во европските институции и ќе стави крај на децениските злоупотреби во земјоделскиот сектор.
