Неочекувана ситуација се случила во хрватскиот град Сплит, каде што полицијата среде настап го прекинала концертот на познатиот белградски состав „ЕКВ Круг“, откако било утврдено дека дел од музичарите немале соодветна документација за работа.
Инцидентот се случил на 23 октомври, околу 23:30 часот, во угостителски објект на улицата Слобода, каде што групата настапувала пред публика.
Според информациите од хрватската полиција, службениците пристигнале по добиена пријава дека во локалот настапуваат странски државјани без потребните потврди за пријавена работа.
При извршената проверка било утврдено дека четворица членови на составот не ја поседувале пропишаната документација, поради што концертот бил веднаш прекинат.
Од полицијата нагласиле дека музичарите не биле уапсени, туку биле повикани во полициска станица за понатамошна постапка согласно Законот за странци. Членовите на бендот постапиле по повикот.
За време на интервенцијата се случил и дополнителен инцидент, кога жена под дејство на алкохол го нарушувала јавниот ред и мир. Против неа се води посебна постапка.
Од сплитскиот клуб „BackBar Plan B“ потврдиле дека настапот бил прекинат поради недостиг на потребните дозволи. Оттаму објасниле дека станувало збор за процедурална грешка и дека до последен момент очекувале документацијата да пристигне навреме.
„ЕКВ Круг“ е музички состав основан во 2006 година, чија цел е да го зачува наследството на легендарната југословенска рок-група „Екатарина Велика“.
Бендот во минатото повеќепати настапувал во Хрватска без инциденти, поради што неочекуваниот прекин на концертот предизвикал дополнително внимание во јавноста.
