Жупанискиот суд во Бихаќ изрече пресуда од 42 години затвор за 62-годишниот Мехмед Вукалиќ, поранешен домар во гимназијата во Сански Мост, кој минатата година го изврши тројното убиство што ја потресе јавноста во регионот.
Судот утврди дека Вукалиќ е виновен за бруталното ликвидирање на три лица: директорот на гимназијата Нијаз Халиловиќ, секретарката Нисвета Кљуниќ и професорката по англиски јазик Гордана Миџан. За секое убиство, тој доби по 14 години затвор, а дополнително му беше пресудена уште една година за незаконско поседување оружје, по што казните беа обединети во единствена – 42 години затвор.
Злосторството се случи во август 2024 година, кога Вукалиќ вооружен со автоматско оружје влегол во училиштето. Според доказите, најпрво се упатил кон канцеларијата на директорот Халиловиќ и испукал пет куршуми во него. Потоа продолжил кон секретарката Кљуниќ, која ја усмртил со четири истрели. На крај, во ходникот се соочил со професорката Миџан и ја застрелал со уште пет куршуми, оставајќи ја без знаци на живот.
По нападот, Вукалиќ се обидел да си го одземе животот, но медицинските тимови успеале да ги стабилизираат повредите и тој преживеал.
Неговата одбрана во текот на судскиот процес тврдеше дека Вукалиќ подолг период бил изложен на дискриминација и понижување на работното место, што, според нив, довело до сериозна психолошка состојба. Судот сепак утврди дека тој ги извршил убиствата во состојба на намалена пресметливост, но не и во состојба на невменост.
На последното рочиште Вукалиќ јавно изразил каење, наведувајќи дека жали за стореното и последиците што ги оставил.
Тој има законско право да вложи жалба на оваа пресуда пред Врховниот суд на Федерацијата Босна и Херцеговина.
