Бугарија е втората држава во Европа по богатство на минерално наследство, веднаш по Исланд, истакна Ивајло Захариев од Бугарската асоцијација за термално наследство. Според него, овој природен ресурс не се користи доволно добро, иако потенцијалот е огромен – само од изворот кај Централната минерална бања во Софија секојдневно завршуваат по еден милион литри минерална вода во канализација.
Во Бугарија се присутни сите осум видови минерална вода што постојат во светот, а во Софија може да се најдат седум од нив. Повеќето извори се во јужниот дел на земјата, додека северниот дел има значително помалку. Минералната традиција е стара повеќе од 2000 години, наследена од Тракијците, Римјаните и Османлиите.
Денес во земјата има околу 125 минерални бањи, но само 50 се активни, а мал дел се во добра состојба. Во Софија постојат 12 бањи, но активни се само две – во Панчарево и Банкја, при што Бањата во Банкја е претворена во СПА центар.
Захариев јасно ја нагласува разликата меѓу класичните минерални бањи и современите СПА центри: минералната бања нуди балнеолошки третман и релаксација со постојано обновувачка вода, додека СПА центрите се насочени кон семејна забава и хемиски третирана вода.
Бугарската асоцијација за термално наследство иницираше меморандум за обновување на Централната минерална бања во Софија, со цел враќање на традицијата и целосно искористување на природното богатство.
