Во голема полициска акција во Солун, спроведена на 30 септември, биле приведени шест лица, меѓу кои 23-годишен државјанин на Србија кој се барал со Интерполова црвена потерница, како и 40-годишен Србин за кого српските истражители се сомневаат дека бил еден од организаторите на криминална група поврзана со кражба и препродажба на луксузни автомобили.
Акцијата била реализирана во угостителски објект на новото солунско крајбрежје. Припадници на грчката полиција влегле во локалот и ја привеле групата мажи.
Освен 23-годишниот и 40-годишниот Србин, биле приведени уште тројца државјани на Србија, на возраст од 24, 24 и 25 години, како и 55-годишен државјанин на Чешка.
При проверката, полицајците кај повеќе лица пронашле документи за кои постои сомнение дека се фалсификувани. Дваесет и тригодишникот поседувал српски пасош со својата фотографија, но документот бил издаден на друго име.
Кај 25-годишниот српски државјанин, пак, била пронајдена хрватска лична карта која гласела на име на друго лице и за која исто така постои сомнение дека е фалсификувана.
Особено внимание на истражителите привлекол 40-годишниот Србин. Кај него биле откриени украински пасош издаден на друго име, украинска возачка дозвола и словачка лична карта. Според информациите што ги објавија грчките извори, со украинскиот пасош тој влегол во Грција на 27 септември, односно само три дена пред полициската акција.
Српските медиуми објавија дека станува збор за М. Т., против кого во Србија веќе се води постапка поврзана со организиран криминал.
Српското Министерство за внатрешни работи во јануари 2024 година соопштило дека во полициска акција спроведена во Белград, Шабац, Нови Сад и Сремска Митровица биле уапсени 11 лица, меѓу кои и М. Т.
Тој, заедно со уште едно лице, бил посочен како можен организатор на криминалната група, додека со кривичната пријава биле опфатени уште 14 лица.
Според тогашните сомневања на српската полиција, групата во периодот од 2020 до 2024 година набавувала понови и луксузни автомобили кои претходно биле украдени во земји членки на Европската Унија.
Украдените возила биле внесувани во Србија, каде што во гаражи и автосервиси им биле менувани броевите на шасијата и моторите, со цел да се прикрие нивното потекло.
По извршените измени, автомобилите со фалсификувана документација биле продавани во Србија и во други европски земји како возила за кои се тврдело дека се легално стекнати.
Српското МВР тогаш проценило дека криминалната група на овој начин се стекнала со противправна имотна корист од повеќе милиони евра.
При претресите во рамки на истрагата биле пронајдени автомобили и автомобилски делови, како и електронска опрема за која се сомневало дека можела да се користи за стартување и кражба на луксузни возила. Биле откриени и неколку стотици илјади евра, како и поголема количина златен накит.
Сепак, главната цел на полициската акција во Солун бил 23-годишниот српски државјанин, по кого била распишана меѓународна потерница поради грабеж во Белград во 2025 година.
Според документите на српските власти кои ги пренесуваат грчките медиуми, случајот бил поврзан со криптовалути чија вредност надминувала 50.000 евра.
Грчките истражители проверувале и информации според кои неговото доаѓање во Солун можело да има врска со подготовка на ново кривично дело.
Дел од грчките медиуми, повикувајќи се на полициски извори, објавиле дека се истражувала и можноста тој да подготвувал напад врз член на спротивставена криминална група. Станува збор за сомнение кое засега не е потврдено со обвинение.
Дваесет и тригодишниот Србин ден по полициската акција бил изведен пред грчкиот обвинител. Тој се согласил да биде екстрадиран во Србија, каде што треба да продолжат постапките поврзани со случаите за кои е баран.
