Ена Беговиќ останува запаметена како една од најубавите и најталентирани актерки на просторот на поранешна Југославија. Нејзината блескава кариера и приватната среќа беа прекинати во момент кога животот конечно ѝ се насмевна.
Во 2000 година таа се омажи за Јосип Радељак, а кратко потоа ја роди ќерката Лана, која долго време ја посакувала. Но, само 45 дена по породувањето, семејната среќа беше заменета со незапаметена трагедија.
На 15 август 2000 година, за време на престојот на островот Брач, Ена со семејството тргнала во посета на пријатели. Во теренското возило биле нејзиниот сопруг, неговиот син, мајката на актерката и новородената Лана.
Според тогашните информации, по технички проблем со возилото, тоа почнало неконтролирано да се движи наназад по угорница и завршило во провалија. Ена Беговиќ не ги преживеала тешките повреди, додека останатите патници биле повредени. Нејзината ќерка, иако се здобила со сериозни повреди, успеала да преживее.
Трагедијата ја потресе целата поранешна Југославија. Само неколку недели претходно, актерката го прославила својот 40. роденден и започнала ново поглавје како мајка.
Ена Беговиќ зад себе остави богата актерска кариера. Публиката ја памети по бројните улоги во театарот, филмот и телевизијата, меѓу кои „Глембаеви“, „Пад Италије“, „Чаруга“ и „Балкан експрес 2“. Со својот талент, харизма и препознатлива убавина стана една од најголемите филмски ѕвезди во регионот.
И повеќе од две децении по нејзината смрт, нејзината животна приказна продолжува да буди емоции. Многумина сметаат дека замина токму во моментот кога требаше најмногу да ужива во семејниот живот и мајчинството, оставајќи зад себе наследство што сè уште живее преку нејзините незаборавни улоги.
