Во Крмин, близу границата со Словенија, лизгањето на земјиштето урна трикатна куќа, при што спасувачите успеаја да извлечат едно лице живо од урнатините. Сепак, двајца жители сè уште се водат како исчезнати.
Пожарникарите интервенираат и во областа Романс д'Изонко, каде што реките се излеаја и предизвикаа поплави. Во Бракане, село во општина Крмин, свлечиштето затрупа куќа, а на терен пристигнаа повеќе возила за итни случаи и хеликоптер. Едно лице со скршена нога е извлечено и префрлено во болница во Удине.
Неколку семејства беа евакуирани по Виа Сан Џорџо поради ризик од нови свлечишта. „Врнеше многу синоќа, огромни количини. За жал, некои луѓе сè уште се водат како исчезнати“, потврди градоначалникот на Крмин, Роберто Фелкаро.
Италијанските власти мобилизираа дополнителни спасувачи од Венеција поради поплавите и свлечиштата во регионот Фриули. За само шест часа наврнаа 152 мм дожд, што предизвика реката Иудрио да се излее од своето корито и големи поплави. Реката Торе го поплави градот Роман д'Исонцо, каде пожарникарите интервенираат со мали чамци и хеликоптери.
Многу жители се засолниле на покривите од своите куќи и чекаат евакуација, а снимките од воздух покажуваат големи штети предизвикани од невремето.
