Шведската влада официјално соопшти дека во наредните години ќе ја прекине развојната помош за пет земји, со цел средствата да бидат пренасочени кон значително зголемување на поддршката за Украина.
Министерот за меѓународна развојна соработка и надворешна трговија, Бенџамин Дуса, објави дека помошта постепено ќе престане да се доделува за Зимбабве, Танзанија, Мозамбик, Либерија и Боливија. Според него, Шведска ги прилагодува своите приоритети на глобалните политички и безбедносни услови.
Дуса нагласи дека Украина останува највисок приоритет на Шведска во надворешната политика и развојната соработка. Владата планира до 2026 година да ја зголеми помошта за Украина на најмалку 10 милијарди круни, што изнесува околу 910 милиони евра.
Со новата стратегија, Шведска очекува да ослободи повеќе од две милијарди круни во периодот што следи, средства кои ќе бидат пренасочени за украински проекти, вклучувајќи ја обновата на енергетската инфраструктура – една од најтешко погодените области во земјата.
Ова не е прва голема промена во политиката на Шведска. Од 2022 година, откако актуелната влада дојде на власт, земјата веќе ја намали помошта за повеќе од 10 држави, меѓу кои Буркина Фасо и Мали.
И покрај овие промени, Шведска останува еден од најголемите глобални донатори на хуманитарна помош. Во последните три години, земјата издвојува околу 56 милијарди круни годишно за хуманитарни цели, што ја позиционира како еден од најзначајните поддржувачи на меѓународните развојни и хуманитарни програми.
