Жена на околу 40 години загина, а 27 лица се повредени откако иранска балистичка ракета погоди станбена зграда во Тел Авив доцна во саботата. Таа е првата жртва во Израел во новиот бран на конфликтот со Иран.
Жената била извлечена во критична состојба, но починала на пат кон болница. Две лица се со потешки повреди, 25 се полесно повредени, а меѓу нив има и седум деца. Спасени се и двомесечно бебе и неговата сестра. Спасувачките екипи ги пребаруваа урнатините, додека повеќе автомобили изгореа по ударот.
Нападот следува по големата заедничка воена операција на САД и Израел против Иран, во која, според извештаите, бил убиен врховниот лидер Али Хамнеи, како и високи ирански функционери.
Според американски извори, во првите 12 часа од операцијата биле извршени стотици напади врз цели во Иран, додека Техеран возвратил со стотици ракети, дел од нив насочени кон Израел. Експлозии биле пријавени и во неколку земји од Заливот.
Сирени се огласиле низ цел Израел, а властите ги повикале граѓаните да останат во близина на засолништа.
Претседателот на САД Доналд Трамп и израелскиот премиер Бенјамин Нетанјаху изјавија дека целта на офанзивата е да се ослабне иранскиот режим и да се создадат услови за политички промени во земјата.
