Во последното ажурирање за WhatsApp, направени се одредени забележителни промени кои ќе го олеснат повикувањето преку апликацијата.
Новата WhatsApp бета верзија за Android 2.25.5.8 има редизајнираното мени во тест-фаза, кое им овозможува на корисниците подобра контрола над повиците.
Некои бета тестери може да го користат новото мени за повикување на врвот од нивниот разговор во апликацијата.
Ова мени ги комбинира досегашните две копчиња што се користат за започнување на гласовен или видео повик во едно копче за повикување.
Во индивидуалните разговори, ова копче ќе прикаже икона за гласовен повик, но тоа не значи дека видео повиците не се достапни. Наместо тоа, кога корисникот ќе го притисне копчето за повикување, ќе се појави мени кое ќе дозволи избор помеѓу гласовен или видео повик. Покрај тоа, во менито ќе има и опција за брзо креирање и споделување линк за повик и полесно креирање на покани за други да се приклучат на повикот.
Во групните разговори, копчето за повикување ќе прикажува икона за видео повик и ќе функционира на ист начин како и иконата за гласовни повици.
Еден од најкорисните додатоци е можноста за избор на учесникот кој сакате да го повикате, наместо да повикате цела група. Ова ќе обезбеди поголема флексибилност и контрола врз повиците.
Новото мени помага и во спречување на случајни повици, бидејќи корисникот прво мора да ги потврди своите преференции за повикување, што додава дополнителен чекор кој го намалува ризикот од случајно повикување на контакти или групи.
Редизајнираното мени со новите опции за повикување е достапно за одредени корисници на WhatsApp бета за Android преку Google Play Store, додека за iOS ќе биде достапно подоцна.
