Запознајте го украинскиот Франкенштајн: Моќно импровизирано оружје кое украинците сами го создадоа [ФОТО]

Украинските сили неодамна го претставија својот нов, импровизиран мобилен систем за противвоздушна одбрана наречен „Драгон H73“, кој е комбинација од советски ракети од времето на Студената војна и американско воено возило Хамви. Ова уникатно оружје, кое украинските медиуми го нарекуваат „Франкенштајн систем“, е изработено по принципот „направи сам“ од страна на 3. јуришна бригада и е наменето за пресретнување на беспилотни летала и борбени авиони.

„Ова мобилно оружје се базира на првиот модел на Хамви“, изјави командантот на единицата, познат по позивниот знак „Шаман“. Тој додаде дека системот е дизајниран за да се справи и со тактички авиони и со големи беспилотни летала како што се „Орлан“ и „Шахед“. „Го користиме 24 часа на ден, секој ден, без прекин“, рече Шаман во објава на официјалната Фејсбук страница на бригадата.

„Драгон H73“ е опремен со двоен лансер за ракети од типот R-73, советски ракети воздух-воздух развиени во 1980-тите за борбени авиони. Во украинската верзија, тие се адаптирани за копнена употреба и монтирани на шасија од Хамви, создавајќи вистински хибрид на бојното поле.

За подобрување на обуката на операторите, единицата користи современи симулатори што ги реплицираат командите и интерфејсот на реалниот систем. „Новата технологија навистина ни помага“, рече Шаман. „Порано немавме можност да седнеме, да ги притиснеме вистинските копчиња и да го видиме интерфејсот. Сега, со помош на симулаторите, можеме целосно да се подготвиме како да сме во вистинска борбена ситуација.“