Претседателот на Србија, Александар Вучиќ, изјави дека против земјата веќе подолго време се води сериозна хибридна војна, чија цел, според него, е да се урне независната и суверена политика што ја води државата. Тој посочи дека само во последниот период се одржале над 25.000 непријавени собири низ земјата и дека Србија е изложена на постојани притисоци од различни страни на светот.
„Како претседател направив сè за да го зачувам мирот и стабилноста во Србија. Се соочуваме со санкции, со надворешни влијанија и со хибридни напади кои доаѓаат од сите страни. Основната причина за тоа е нашата независна политика што ја водиме исклучиво во интерес на граѓаните“, изјави Вучиќ за РТС.
Тој нагласи дека токму поради независниот курс што Србија го следи, постојат обиди да се дестабилизира државата и да се создадат внатрешни поделби. Вучиќ се осврна и на последните инциденти пред Народното собрание, предупредувајќи дека политичките тензии во земјата се на највисоко ниво од почетокот на неговиот мандат.
„Веќе една година трпиме страшно насилство. Луѓето стотици илјади пати биле спречувани да се движат низ улиците. Имало над 25.000 илегални собири, кои и покрај тоа што биле непријавени, државата ги обезбедуваше заради нивната безбедност. Потрошени се десетици милиони евра само за да се спречат поголеми инциденти“, додаде тој.
Со ваквите изјави, Вучиќ уште еднаш ја потенцира својата позиција дека Србија е под постојан надворешен притисок и дека неговата главна цел е зачувување на стабилноста и државното единство, и покрај растечките политички поделби и тензии во земјата.
