Дмитриј Медведев, поранешен претседател на Русија и актуелен заменик-претседател на Советот за безбедност, остро го нападна американскиот претседател Доналд Трамп, нарекувајќи ги неговите последни потези „чин на војна“ против Русија. Повод за ваквата изјава се новите санкции на САД кон руските нафтени гиганти „Лукоил“ и „Роснефт“, како и откажувањето на планираниот самит меѓу Трамп и Владимир Путин.
„САД се нашиот непријател, а нивниот ‘миротворец’ Трамп сега отворено тргна по патот на војната против Русија“, напиша Медведев на Телеграм, додавајќи дека американскиот претседател „целосно застанал на страната на помешаната Европа“. Тој истакна дека иако Трамп не испраќа војска во Украина, воведените мерки имаат ист ефект како директен напад.
Медведев порача дека Русија повеќе нема намера да губи време на дипломатски преговори и дека ќе одговори со сите расположливи средства, вклучувајќи и употреба на својот воен арсенал против, како што рече, „бандеровските скривалишта“.
Американското Министерство за финансии, предводено од министерот Скот Бесент, ги оправда санкциите со одбивањето на Москва да стави крај на војната во Украина. „Овие мерки се јасен сигнал дека САД нема да стојат на страна додека Русија ја продолжува оваа бесмислена агресија“, изјави Бесент.
Со новите санкции, Трамп направи пресврт во својата досегашна политика кон Русија – првпат откако е на власт воведува сериозни економски ограничувања поврзани со конфликтот во Украина, со што значително ги заостри односите меѓу двете нуклеарни сили.
