Поради израелската блокада на испораката на помош преку копнените премини, 90% од населението во Газа нема сигурен пристап до вода, а 80% од граѓаните го изгубиле пристапот до храната, објави Службата за соработка со медиумите во Газа.
Недостигот на леб се влошува, бидејќи 25% од пекарите во Газа престанале со работа, а останатите се на работ на затворање поради недостиг на гориво. Кризата со водата се влошува, бидејќи недостигот на гориво ги затвори бунарите и водоснабдителните инсталации, оставајќи 90% од населението без сигурен пристап до вода, се наведува во соопштението што го пренесе Ал Џезира.
Во истото соопштение се додава дека многу програми за управување со отпад и расчистување на патиштата се стопирани, бидејќи општините ги насочуваат своите ресурси за гориво кон водоводните претпријатија.
Се истакнува дека блокадата на помошта предизвикала сериозна здравствена и еколошка криза, особено со растечките температури.
Дополнително, недостигот на лекови и медицински материјали сериозно ги погоди 150.000 пациенти со хронични болести и ранети, додека транспортните и комуникациските системи се блиску до целосно урнисување.
