Поради зголемената опасност од шумски пожари, од утре, недела 23 август, на Халкидики ќе стапи во сила забрана за движење на пешаци и возила во одредени шумски подрачја.
Мерката ќе важи од 08:00 до 20:00 часот, а за нејзино непочитување е предвидена казна од 300 евра.
Одлуката е донесена врз основа на проценетиот ризик од пожари и препораките на надлежните служби, а опфаќа делови од општините Касандра, Ситонија и Аристотел.
Во Касандра ограничувањето ќе важи во подрачјето Корфограмми, од Касандрина до Агија Параскеви, како и во Арапс и Халковуни кај Палиури.
Во Ситонија забраната го опфаќа гребенот Драгундели, од Пчеларската задруга до Сикија, додека во општина Аристотел ќе важи од Комица до Уранополис, како и во Цамија Стратоникис, Фисока и Стрелиште Стратонија.
На терен ќе има засилени полициски и противпожарни патроли. Лицата затекнати во зоните каде што движењето е забрането ќе бидат отстранувани, а надлежните ќе ги евидентираат и регистарските таблички на возилата забележани во шумските подрачја.
Исклучок од забраната се припадниците на доброволните организации ангажирани во активностите за заштита од пожари.
Надлежните апелираат и до жителите и до туристите на Халкидики строго да ги почитуваат ограничувањата поради високиот ризик од избувнување и брзо ширење на пожари.
