Шокантен инцидент бил спречен во средно училиште во Оклахома, кога поранешен ученик вооружен со пиштол влегол во зградата и се обидел да нападне ученик во ходникот.
Според снимки од надзорните камери, 20-годишниот Виктор Хокинс мирно влегол во училиштето и во еден момент вперил оружје кон ученик кој седел во ходникот, создавајќи сцена на целосна паника.
Во клучниот момент, директорот на училиштето, Кирк Мур, излегол од училница и без двоумење се фрлил врз напаѓачот. Со тоа го соборил и спречил да продолжи со нападот, додека ученикот успеал да избега.
Во хаосот што следел, уште еден вработен во училиштето притрчал и успеал да го одземе оружјето од напаѓачот, по што ситуацијата била ставена под контрола. Благодарение на брзата реакција, спречена е потенцијална трагедија од големи размери.
За време на физичката борба, директорот бил ранет во ногата, но бил веднаш пренесен во болница и се наоѓа во стабилна состојба, додека се опоравува од повредата.
Според властите во Оклахома, ниту еден ученик не е повреден во инцидентот, што се смета за огромна среќа во целата ситуација.
Истражителите потврдиле дека осомничениот се соочува со сериозни обвиненија, меѓу кои и обид за убиство. Во изјави се наведува дека тој наводно изразил намера да предизвика масовен напад, што дополнително ја зголемува тежината на случајот.
Настанот повторно ја отвори дебатата за безбедноста во училиштата и брзата реакција на наставниот кадар, кој овојпат буквално спречи масакр во последен момент.
