Министерството за енергетика, рударство и минерални суровини објави јавен повик за доделување ваучери за купување и вградување на инвертер клима уреди, мерка наменета за заштита на ранливите потрошувачи на енергија во 2026 година.
За прв пат, целиот процес на аплицирање ќе се одвива целосно електронски, преку веб-страницата на Министерството, со што значително се поедноставува постапката за граѓаните. Наместо носење документи на шалтери и административни чекања, апликантите ќе можат да ја завршат постапката онлајн, што се оценува како чекор кон дигитализација и модернизација на јавните услуги.
Со програмата се предвидува доделување ваучери за набавка и монтажа на инвертер клима уреди со моќност од 3,5 kW и минимална енергетска класа А+, со цел намалување на трошоците за електрична енергија и подобрување на енергетската ефикасност во домаќинствата.
Право на учество имаат домаќинства кои вклучуваат лица корисници на надоместок заради попреченост, како и домаќинства со деца со попреченост до 26 години кои користат посебен додаток. Притоа се утврдени јасни доходни граници за 2025 година, а при пресметка на приходите не се вклучуваат надоместоците за попреченост.
Условите се поделени според бројот на членови во домаќинството:
- за едночлено домаќинство до 30.000 денари месечен доход
- за домаќинство со два члена до 45.000 денари
- за три члена до 63.000 денари
- за четири и повеќе членови до 83.000 денари
За домаќинства со деца со попреченост важат слични лимити, зависно од бројот на членови, при што посебниот додаток не се засметува во вкупниот доход.
Едно лице може да поднесе само едно барање по домаќинство. Исклучени се корисници на цивилна или воена инвалиднина, како и приматели на гарантирана минимална помош и додаток за енергенси.
Аплицирањето се врши исклучиво електронски преку платформата www.aplikanti.energy.gov.mk, каде што граѓаните треба да достават целосна документација, вклучувајќи заверени изјави, решенија за права, лични документи и докази за состав на домаќинството. Доколку документите се некомплетни, ќе биде овозможен рок за дополнување.
Изборот на корисници ќе се врши по принцип „прв до комплетна апликација“, сè до исцрпување на средствата, додека Министерството ќе врши проверки преку надлежните институции. Листите на добитници ќе бидат јавно објавени.
Рокот за аплицирање изнесува 30 дена од денот на објавување на јавниот повик, по што ќе следи обработка и распределба на ваучерите.
Со оваа мерка, државата најавува директна поддршка за најранливите категории граѓани и истовремено вложување во енергетска ефикасност и намалување на трошоците во домаќинствата.
