Жена во јужнокорејскиот град Осан предизвикала пожар во станбена зграда, откако се обидела да убие лебарка со комбинација од запалив спреј и запалка. Според информациите објавени од локалните медиуми и Би-би-си, таа несвесно запалила сопствениот стан, од каде пожарот се проширил низ зградата.
Во несреќата животот го загубила млада жена – кинеска државјанка, која живеела на петтиот кат со својот сопруг и новородено бебе. При обид за бегство, тие го предале бебето на сосед, но жената паднала од прозорецот и подоцна им подлегнала на повредите во болница.
Осум други жители се хоспитализирани со респираторни проблеми поради вдишување чад.
Зградата има продавници на приземјето и 32 станови, од вториот до петтиот кат. Полицијата соопшти дека против жената која го предизвикала пожарот ќе бидат поднесени обвиненија за палење и убиство од небрежност.
Властите предупредуваат за зголемениот број на инциденти поврзани со употреба на опасни методи за уништување инсекти, поттикнати од видеа на социјалните мрежи. Според експертите, користењето запаливи материи во затворен простор може да биде смртоносно и не треба да се практикува.
