Североисточна Јапонија утрово беше погодена од земјотрес со јачина од 6,7 степени, што доведе до издавање предупредување за цунами од страна на Јапонската метеоролошка агенција. Потресот се случи во 11:44 часот наутро, на длабочина од 20 километри, во крајбрежното подрачје на префектурата Аомори. Овој земјотрес доаѓа само неколку дена по посилен потрес со јачина од 7,5 степени што ја погоди истата област.
Јапонската метеоролошка агенција предупреди дека брановите од цунамито можат да достигнат висина до 1 метар, а по нивниот настап, бранови до 20 сантиметри (8 инчи) ги зафатија бреговите на префектурите Аомори и Хокаидо. Жителите на погодените подрачја се повикани да останат внимателни и да се преселат на повисоки места, бидејќи се очекуваат последователни потреси.
Јавниот радиодифузен сервис NHK соопшти дека денешниот земјотрес е послаб од оној во понеделникот, а властите нагласија дека нема пријавени прекини во нуклеарните централи во областа.
Јапонската премиерка Санае Такаичи потврди дека денешниот потрес не е поврзан со предупредувањето за можен мегаземотрес кое беше издадено претходно оваа недела. Такаичи ги повика граѓаните да останат внимателни, да ги проверат патиштата за евакуација и да се осигураат дека имаат доволно итни залихи, во случај на понатамошни потреси.
