Во текот на ноќта, руските сили извршија интензивен ракетен и беспилотен напад врз украинскиот главен град Киев, погодувајќи станбени области и цивилна инфраструктура. Локалните власти известија за бројни пожари и најмалку 19 повредени, од кои 14 се хоспитализирани.
Нападот дојде само неколку часа по телефонскиот разговор меѓу американскиот претседател Доналд Трамп и рускиот претседател Владимир Путин. Според извештаите, најмалку 13 локации во Киев беа погодени, а градската воена администрација предупреди на опасни честички од согорување во воздухот.
Шефот на администрацијата, Тимур Ткаченко, го нарече Русија „терористичка држава“ и ги осуди нападите како „пустош и терор“. Експлозиите почнале околу 22 часот и траеле до утринските часови, при што Русија користела балистички ракети и беспилотни летала.
Слични напади беа регистрирани и во градот Полтава, каде беа повредени две лица и оштетени објекти.
Оваа ескалација следи по неодамнешните најголеми напади врз Киев, кои предизвикаа смрт и рани меѓу цивилите, и покрај повиците на Западот за прекин на огнот.
Украинските власти тврдат дека целта на овие напади е исцрпување на воздушната одбрана и тероризирање на цивилите. Во меѓувреме, САД донесоа одлука да ја запре испораката на ракети „Патриот“ за Киев, со образложение за потреба од надополнување на сопствените залихи.
