Украинскиот претседател Володимир Зеленски денес оствари разговор со претседателката на Европската комисија, Урсула фон дер Лајен, што го сподели на социјалната мрежа X. Тој ја истакна својата благодарност за „јасната позиција и поддршката што таа ја изнесе за Украина“ во денешниот говор пред Европскиот парламент во Брисел.
Зеленски нагласи дека се согласува со ставот на комисијата: додека Русија ги одбива сите мировни иницијативи, санкциите против неа мора да се заострат, а одбранбената и финансиската помош за Украина мора да продолжи.
Една од клучните теми на разговорот биле замрзнатите руски средства, од кои значителен дел се наоѓа во земјите на Европската Унија. Во моментов се води дебата дали овие средства можат да се користат за финансирање на украинската одбрана. Зеленски истакна дека се разговарало и за моменталната дипломатска ситуација и за активностите на ЕУ околу одлуката за употреба на замрзнатите руски средства за поддршка на украинските одбранбени капацитети.
Со овој состанок, Зеленски потврди дека Украина продолжува да ја цени стратешката поддршка на Европската Унија и дека соработката во одбранбениот и финансискиот сектор останува клучен приоритет во текот на конфликтот.
