Украина ја изрази својата подготвеност да ги разгледа предлозите на САД за прекин на војната, соопшти претседателот Володимир Зеленски во своето вечерно обраќање. Тој истакна дека Русија продолжува со секојдневен терор и одбива било каков прекин на огнот или вистински мирни разговори.
„Ние позитивно реагиравме на сите предлози од Соединетите Држави и претседателот Трамп за прекинување на нападите и убиствата. Украина исто така предложи различни формати за ставање крај на војната,“ изјави Зеленски.
Според украинскиот лидер, сегашната војна е водена исклучиво од Владимир Путин, а меѓународната заедница треба да извлече заклучоци по инцидентот со руски дронови на територија на Полска. Киев ќе продолжи да бара меѓународна поддршка за дипломатски иницијативи кои можат да донесат вистински мир.
Претходно, американскиот претседател Доналд Трамп изјави дека Украина треба да склучи договор за да се стави крај на војната и повика Европа да ја прекине купопродажбата на руска нафта, со цел ограничување на економските ресурси на Москва.
