Три трагедии го потресоа грчкото крајбрежје во недела, 13 јули, кога три лица ги загубија животите во морето на различни локации низ земјата.
Првата трагедија се случила околу пладне, кога пристанишните власти во Солун биле известени за пронајдено тело на жена во морските води кај пристаништето. Според информациите, се работи за жена на возраст меѓу 50 и 55 години, но засега не се познати дополнителни детали, ниту нејзината националност. За случајот е отворена прелиминарна истрага, која ја води Централната пристанишна управа на Солун.
Неколку часа подоцна, на островот Тилос, уште еден трагичен настан – 82-годишен Грк бил пронајден во несвест на плажата Плака. Тој бил веднаш пренесен со амбулантно возило на ЕКАБ до болницата Ливади, но лекарите само можеле да ја констатираат неговата смрт. Информацијата ја пренесе и грчкиот медиум Прототема.
Најпосле, третиот случај бил забележан на плажата Микиверна, во општината Полигирос, Халкидики. Таму бил пронајден во несвест уште еден постар маж – 88-годишен грчки државјанин. И кај овој случај е започната прелиминарна истрага за да се утврди причината за смртта.
Со летната сезона во полн ек и сè поголем број туристи на грчките плажи, властите апелираат на внимателност и почитување на мерките за безбедност, особено кај повозрасните лица и оние со здравствени проблеми.
