Тешка сообраќајна несреќа ја потресе Калифорнија откако пијан возач поминал на црвено светло и со голема брзина удрил во автомобил во кој се наоѓала 24-годишната бремена Бианка Есквивел. Таа и нејзиното неродено бебе трагично го загубиле животот на самото место.
Според информациите, Бианка заедно со својот партнер доцна навечер излегле да земат храна, со цел да ѝ ја исполнат желбата поврзана со бременоста. Несреќата се случила само неколку моменти откако се враќале кон домот. Во моментот на судирот, Бианка се наоѓала на совозачкото седиште.
Полицијата соопшти дека осомничениот, 24-годишниот Даниел Рамос од Риверсајд, управувал возило марка „Лексус“ и поминал на црвено светло, по што со голема брзина удрил во „Тојота“-та што ја возел партнерот на Бианка, Оскар. Судирот се случил околу 00:10 часот на крстосницата помеѓу North Anaheim Boulevard и State Route 91.
Рамос бил уапсен веднаш по несреќата поради сомнение за возење под дејство на алкохол и убиство од небрежност со возило. Полицијата навела дека на местото на настанот покажувал јасни знаци на алкохолизираност.
Сестрата на Бианка, Вири, изјави дека семејството е скршено од болка и тешко може да ја прифати загубата.
„Не очекувавме да ја изгубиме Бианка толку рано. Нејзиното бебе никогаш немаше шанса да дојде на овој свет. Тој човек му ја одзеде шансата на еден ангел“, изјави таа.
Партнерот на Бианка, Оскар, кој го управувал возилото, се здобил со тешка повреда на раката и е хоспитализиран, при што го очекува оперативен зафат, соопшти семејството. Во меѓувреме, на интернет е покрената хуманитарна кампања под наслов „Bianca and her unborn angel“, преку која досега се собрани нешто повеќе од 1.000 долари од целта од 25.000 долари.
Организаторите на кампањата наведуваат дека секоја донација или споделување значи неизмерна поддршка за семејството и се знак на почит кон Бианка и нејзиното неродено бебе.
Истражните органи најавија дека против Даниел Рамос се очекува да бидат поднесени дополнителни кривични пријави, имајќи предвид дека жртвата била бремена во моментот на несреќата.
