Претседателот на Соединетите Американски Држави, Доналд Трамп, изјави дека неговата цел е целосно да се отстрани раководната структура во Иран.
Трамп рече дека сака да „влезе и да исчисти сè“ и дека не сака личност која би го обновила режимот во следните 10 години. Тој истакна дека веќе има идеи за тоа кој би можел да биде „добар лидер“ за земјата и дека презема чекори за тие луѓе да преживеат војната.
Претседателот додаде дека ќе мора да биде вклучен во именувањето на следниот ирански лидер и дека синот на починатиот врховен лидер, ајатолахот Али Хамнеи, е „неприфатлив“. „Тој е ‘лесна категорија’“, рече Трамп.
Тој смета дека испраќањето американски копнени трупи во Иран во моментов би било „губење време“. „Изгубија сè – морнарицата, воената сила, сè што можеле да го изгубат“, додаде Трамп, коментирајќи ја и изјавата на иранскиот министер за надворешни работи, Абас Арагчи, дека Техеран е подготвен за копнена инвазија од САД или Израел. Трамп ја оцени оваа изјава како „залуден коментар“.
