Американската администрација официјално го покани рускиот претседател Владимир Путин да присуствува на самитот на Г20, кој во декември ќе се одржи во Мајами. Информацијата ја потврди американскиот државен секретар Марко Рубио по средбата со рускиот министер за надворешни работи Сергеј Лавров во Њујорк.
Рубио објасни дека Вашингтон смета оти директните средби се неопходни кога постојат сериозни несогласувања меѓу државите. Според него, самитот би му овозможил на Путин да разговара не само со американскиот претседател Доналд Трамп, туку и со други светски лидери.
„Го поканивме претседателот Путин на Г20. Сметаме дека тоа е можност да разговара не само со претседателот, туку и со други светски лидери“, изјави Рубио, додавајќи дека Вашингтон се надева оти Путин ќе ја прифати поканата.
Сепак, евентуална нова средба меѓу Трамп и Путин сè уште не е договорена. Рубио нагласи дека поканата за Г20 не треба автоматски да се толкува како потврда дека двајцата претседатели ќе одржат билатерална средба.
Разговорот меѓу Рубио и Лавров се одржа во период кога Вашингтон повторно се обидува да отвори простор за дипломатски разговори околу војната во Украина. Американската страна разговара и за можноста за ограничен прекин на нападите врз енергетската инфраструктура, иако засега нема постигнат договор.
Кремљ до овој момент јавно не соопштил дали Путин ќе ја прифати поканата и лично ќе отпатува во Мајами.
