Едно лице го загуби животот, а уште шестмина се здобија со повреди при драматично и неконтролирано слетување на воздухопловен балон во холандската покраина Фрисланд, јавуваат локалните медиуми повикувајќи се на регионалните итни служби.
Несреќата се случила синоќа, околу 21:00 часот по локално време, на поле во близина на селото Де Хеве. Според информации од Кралското холандско воздухопловно здружение, балонот нагло се спуштил за време на приодот за слетување, предизвикан од ненадеен и силен налет на ветер.
Како резултат на тоа, кошот од балонот почнал да отскокнува, а пет патници испаѓале од него во хаотични сцени. Повредените веднаш биле пренесени во болница.
Во моментот на инцидентот, во балонот се наоѓале вкупно 34 лица, што ја прави оваа несреќа уште потресна, со оглед на можниот потенцијал за уште поголема трагедија.
На местото на настанот итно биле испратени две хеликоптерски воздушни амбуланти, 14 амбулантни возила, мобилен медицински тим, како и екипа на Црвениот крст.
Инцидентот го истражува воздухопловната полиција, која треба да утврди точни околности и евентуални пропусти што довеле до оваа трагедија.
