Британската актерка и комичарка Луси Дејвис, позната по улогата во британската верзија на „The Office“, јавно откри дека се соочува со рак на дојката во четврти стадиум.
Според нејзината објава, дијагнозата ја добила пред околу година и половина, а болеста во меѓувреме се проширила на коските, вклучувајќи ги ’рбетот, десниот колк и ребрата.
Дејвис соопшти дека ракот е неизлечив и дека, според нејзините зборови, е предоцна за хемотерапија.
Актерката откри и дека првиот знак што го забележала не бил вообичаена грутка, туку многу мало задебелување кое за малку ќе го игнорирала. Поради сопственото искуство, таа упати порака до јавноста да не ги занемарува промените на телото и навреме да побара лекарска проценка.
Болеста веќе влијаела врз нејзината подвижност. Дејвис понекогаш има тешкотии при подолго стоење и одење, а во одредени ситуации користи и инвалидска количка.
И покрај тешката дијагноза, актерката вели дека сака времето пред неа да го помине со што повеќе смеа, љубов и моменти што ѝ значат. Од семејството и пријателите побарала да продолжат да се шегуваат со неа и да не ја третираат единствено како болна личност.
Дејвис истакна и дека сака да продолжи да работи како актерка, бидејќи глумата останува една од нејзините најголеми радости.
Позната е и по улогите во „The Chilling Adventures of Sabrina“, „Shaun of the Dead“ и „Wonder Woman“.
