Секретарот на Советот за безбедност на Русија, Сергеј Шојгу, упати сериозно предупредување дека ниту еден регион не може да се смета за апсолутно безбеден поради напредокот на украинските воени технологии, особено беспилотните летала.
Шојгу посочи дека зоната на ризик веќе не е ограничена само на граничните подрачја, туку ги опфаќа и внатрешните региони, вклучително и Урал, кој долго време се сметаше за „заштитена зона“. Според него, целта на украинските напади е критичната инфраструктура – воени објекти, транспорт и енергетски инсталации.
Податоците од минатата година покажуваат драматичен раст на инцидентите: во 2025 се регистрирани 1.830 напади, што е 40% повеќе од 2024 и 6,5 пати повеќе отколку во 2023 година. Како одговор, руските власти го засилуваат обезбедувањето на стратешките објекти и формираат специјализирани единици за одбрана.
Интензивните операции со украински дронови во последните денови покажуваат сериозен притисок – само една ноќ биле соборени 206 беспилотни летала, од кои 43 во поширокиот регион на Москва. Кремљ тврди дека овие акции не го менуваат стратешкиот курс на земјата, додека руските вооружени сили продолжуваат со своите операции.
Ова предупредување јасно покажува дека конфликтот се проширува и дека заканата од беспилотни летала веќе не е ограничена на фронтот, туку се заканува да ја наруши безбедноста низ целата територија на Русија.
