Загрижувачка ситуација се развива во Велика Британија, каде бројот на случаи на менингитис расте, а веќе се потврдени и жртви.
Според последните информации, двајца млади – 21-годишен студент и 19-годишен ученик – го загубиле животот, додека четири случаи се официјално потврдени, а уште 11 се под истрага. Сите заболени се хоспитализирани и под медицински надзор.
Надлежните успеале да го лоцираат изворот на инфекцијата, кој води до локален ноќен клуб. Објектот веднаш бил затворен, додека здравствените служби преземаат итни мерки за спречување на понатамошно ширење.
Како дел од одговорот на кризата, на учениците и младите во погодената област им се даваат антибиотици, а во подготовка е и вакцинација за дополнителна заштита.
Дополнително загрижува фактот што се пријавени и два случаи во Франција, кои се поврзуваат со британски универзитет, што укажува дека инфекцијата можеби веќе се проширува и надвор од земјата.
Менингитисот е сериозна болест која може брзо да стане опасна по живот ако не се третира навреме, особено кај млади луѓе. Властите апелираат на внимателност и брза реакција при појава на симптоми.
