Бројот на потврдени случаи на ебола во Демократска Република Конго надмина 5.000, соопшти Институтот за јавно здравје на таа земја.
Како што е наведено во најновиот извештај за ситуацијата, досега се забележани 5.021 случај, вклучувајќи 2.378 со смртен исход, пренесува Ројтерс.
Во меѓувреме, официјалниот претставник на Светската здравствена организација, Тиерно Балде, изјави дека епидемијата на ебола во Демократска Република Конго може да биде ставена под контрола во рок од три месеци, доколку бидат обезбедени потребните ресурси.
СЗО синоќа соопшти дека ширењето на еболата би можело да биде запрено во рок од 90 дена, но оттогаш се појавија знаци на влошување на ситуацијата, откако епидемијата се прошири во шеста провинција.
Најсмртоносна епидемија во историјата на земјата
Епидемијата на ебола во Демократска Република Конго однесе 2.325 животи, надминувајќи го бројот на жртви од епидемијата во периодот 2018–2020 година и станувајќи најсмртоносна во историјата на земјата, покажаа најновите владини податоци.
Моменталната епидемија ја предизвикува видот на ебола Бундибуџо, за кој нема одобрени вакцини или третмани.
Епидемијата доби на замав откако беше прогласена на 15 мај, бидејќи слабата здравствена инфраструктура, отпорот на заедницата и нестабилноста ги попречуваат напорите за идентификување и реагирање на случаите.
Уделот на луѓе кои умираат од епидемијата на ебола по потврдена инфекција, познат како стапка на смртност на случаите, се зголеми од околу 20 проценти на почетокот на јуни на 46 проценти, според владините податоци, што значи дека речиси еден од секои два потврдени случаи сега е фатален.
Експертите велат дека овој тренд не укажува на тоа дека вирусот станал посмртоносен, наведува Ројтерс.
