Соединетите Американски Држави го засилуваат своето воено присуство на Блискиот Исток, додека американскиот претседател Доналд Трамп разгледува можност за нови воени операции против Иран.
Според информациите што ги објавува „Волстрит журнал“, повикувајќи се на разузнавачки извори, постои зголемена загриженост дека иранските планови за напади врз американски персонал навлегле во напредна фаза.
Трамп во петокот, за време на собир на Флорида, ја споменал можноста за нова воена акција, наведувајќи дека САД би можеле да спроведат уште една „мала операција Epic Fury“, алудирајќи на претходна американска воена кампања против Иран.
Според објавените информации, Пентагон веќе му претставил неколку можни сценарија за воено дејствување. Меѓу нив се напади врз ирански нуклеарни постројки, инфраструктурни објекти, како и операции насочени кон острови под иранска контрола.
Конечна одлука за започнување нови напади засега не е донесена.
Во меѓувреме, Вашингтон продолжува со распоредување дополнителни воени сили во регионот. Според извештајот, на Блискиот Исток веќе се присутни две ударни групи носачи на авиони, додека трета пристигнува од Пацификот. Се испраќа и десантен брод со американски маринци.
Поради зголемените безбедносни ризици, американските власти наредиле повлекување на дел од дипломатскиот и воениот персонал од одредени локации.
Новите воени подготовки доаѓаат непосредно пред изборите за американскиот Конгрес, закажани за 3 ноември.
Аналитичарите предупредуваат дека евентуален американски напад би можел да предизвика иранска одмазда и дополнително да ја загрози безбедноста на американските сили.
Потенцијалната ескалација би можела да има сериозни последици и врз светската економија, особено преку можен раст на цените на нафтата и другите енергенси.
