Дури 48 милиони барели руска сурова нафта може да останат „заробени“ на море откако денеска стапија на сила новите американски санкции за руските нафтени компании. Десетици танкери моментално бараат нови дестинации, додека светскиот пазар на нафта сè уште не најде начин да ги заобиколи санкциите.
Кина и Индија, кои се најголеми купувачи на руска нафта од 2022 година, продолжуваат да одржуваат силни врски со Москва. Меѓутоа, двата пазари се претпазливи поради ризикот од секундарни санкции што САД сè повеќе ги воведуваат.
Индиските рафинерии брзо резервираат танкери за снабдување со нафта од Блискиот Исток, што предизвика нагло зголемување на побарувачката за превоз. Цените на превозот на оваа рута достигнаа највисоко ниво за речиси пет години.
Според податоците на Kpler, околу 48 милиони барели руски сорти, првенствено Урал и ЕСПО, моментално се во транзит или на почетокот на товарењето. Ова вклучува околу 50 танкери наменети за Кина и Индија, како и други без јасно наведени дестинации. Тие се расфрлани од Балтичкото Море до Јужното Кинеско Море, бидејќи посредниците се дистанцираат од трговијата поради санкциите.
Дел од танкерите веќе ги менуваат рутите кон обичните места за претовар нафта на море во потрага по нови купувачи.
Аналитичарите проценуваат дека најтешките последици за руската нафта би можеле да траат од 3 до 4 месеци додека трговските синџири се прилагодуваат.
„Болно е, но ќе трае само неколку месеци. Пазарите ќе најдат начини да ги заобиколат пречките и да увезат руска нафта, но ќе избегнат ризик од санкции“, вели Адам Лениг од брокерската куќа SSY.
Прашањето останува колку од оваа руска нафта ќе стигне до рафинериите и колку ќе остане заробена на отворено море, што ќе го одреди краткорочниот тек на цените и снабдувањето на глобалниот пазар на нафта.
