Далеку од луксузот на Монако, но со архитектура која остава без зборови – селото Бузеску во јужна Романија стана светска сензација поради своите импозантни ромски палати, богато украсени со мермерни столбови, кули и покриви што личат на замоци.
Познато како „ромското Монако“, ова село се наоѓа на околу 100 километри од Букурешт и има приближно 4.000 жители. Главната улица изгледа како сцена од филм – едната палата поубава од другата, фасади со симболи на долари, мерцедеси и сјајни метални детали, што го симболизираат успехот и статусот во заедницата.
Палати високи до небо – натпревар кој ќе изгради повеќе катови
Овие монументални градби не се појава од вчера. Тие почнале да се појавуваат по падот на комунизмот во 90-тите, кога многу Роми се вратиле од странство со пари, или добиле назад конфискувано злато од времето на режимот. Голем дел од богатството потекнува и од трговија со отпад или градежни работи во странство, велат сопствениците.
Во Бузеску постои неформална трка во висина – кој ќе направи повисока и поблескава палата, па не е невообичаено да видите куќи со додадени нови катови секоја година.
Живеат во скромност, но слават во раскош
Иако палатите изгледаат како да се од бајка, многу семејства живеат само во една или две соби, додека големите мермерни сали ги користат само за свадби, погреби и други свечени прилики. Дел од куќите изгледаат недовршено или напуштено, но тоа не ја намалува нивната спектакуларност.
Туристите не пропуштаат да ги фотографираат, а Бузеску веќе не е само локална атракција – стана светски позната дестинација за необична архитектура и културна симболика.
