Чешка годинава се соочува со најголемата епидемија на хепатитис А во последните четири децении. Според Државниот завод за јавно здравје (SZÚ), регистрирани се 2.880 случаи, што е дури 4,5 пати повеќе од минатата година. Бројот на починати се искачи на 31, додека лани беа пријавени само две жртви.
Најтешко погодено е главното жариште во Прага, каде што се пријавени над 40% од сите случаи, а потоа следат Средночешкиот регион и Моравско-Шлезиска област. Иако во ноември е забележан благ пад со 505 нови случаи, состојбата останува сериозна.
Заразата се шири меѓу сите возрасни групиЕпидемијата ги зафати сите генерации – од деца до пензионери. Најзастапени се лица на возраст од 35 до 44 години, додека кај децата најмногу заболени има меѓу пет и девет години. Постарите од 65 години во голем дел имаат природен имунитет поради големата епидемија од доцните 70-ти.
Околу 20% од заразените припаѓаат на ранливи групи, како корисници на дрога, лица со зависности и бездомници, но вирусот се шири и во општата популација, особено меѓу студентите и во градските средини.
Три четвртини од заразените се хоспитализираниПовеќе од 75% од пациентите биле примени на инфективни оддели. Блиските контакти на заразените кои не се вакцинирани се под посебен надзор и имаат ограничувања за користење базени, сауни, теретани, како и за работа или училиште. Во Прага околу 5.000 лица веќе се имунизирани како превентивна мерка.
Од 31 починато лице, 28 се мажи, а три се жени. Најголем ризик од тешки последици има кај постари лица, особено оние со хронични заболувања на црниот дроб или ослабен имунитет. Речиси една третина од починатите се на возраст од 60 до 69 години.
Расте интересот за вакцинацијаЕпидемијата предизвика рекорден интерес за вакцини. Годинава се дадени над 220.000 дози, споредено со 66.000 лани. Поради недостиг, Чешка обезбеди итни дополнителни испораки, а до јануари се очекуваат уште 125.000 дози.
Хепатитис А, познат како „болест на валкани раце“, се пренесува преку фекално загадување и може да се пренесе дури и со минимална количина вирус на нечисти раце или контаминирани предмети. Основната превенција е темелно миење на рацете и редовна дезинфекција.
Стручњаците предупредуваат дека вирусот е исклучително отпорен и подолго преживува во ладни и влажни услови, какви што владеат во моментот.
