Владимир Путин денеска, 7 октомври, го одбележува својот 74-ти роденден. Рускиот претседател е роден во 1952 година во тогашен Ленинград, денешен Санкт Петербург, а во повеќе од две децении на највисоките државни функции неговите родендени најчесто поминувале во знакот на работните обврски.
Иако 7 октомври за него вообичаено не значел целосен прекин на државните активности, низ годините имало неколку родендени кои се издвоиле по начинот на кој ги поминал.
Еден од најинтересните примери е неговиот 62-ри роденден во 2014 година. Тогаш, според руските медиуми, Путин за првпат откако е на власт одлучил да земе слободен ден токму на својот роденден.
Наместо официјални состаноци и државни обврски, тој заминал во сибирската тајга, на локација која се наоѓала меѓу 300 и 400 километри од најблиското населено место.
Подоцна Путин открил дека за време на престојот во природата пешачел речиси девет километри низ планински терен. Неговото бегство во дивината претставувало значително отстапување од вообичаениот начин на кој рускиот претседател го поминувал 7 октомври.
Само една година подоцна, роденденот изгледал сосема поинаку.
На 7 октомври 2015 година, Путин имал низа државни активности и разговори, а денот го завршил во Сочи, каде што учествувал во натпревар од Ноќната хокеарска лига.
На хокеарскиот натпревар рускиот претседател постигнал дури седум гола, додека неговиот тим славел со 15:10.
Путин низ годините родендените ги прославувал и надвор од Русија. Во 2002 година, 7 октомври го поминал во Кишињев, каде што учествувал на самитот на Заедницата на независни држави.
Единаесет години подоцна, во 2013 година, роденденот го дочека на Бали, каде што присуствувал на самитот на АПЕК.
И тој роденден имал неколку необични моменти. Тогашниот индонезиски претседател Сусило Бамбанг Јудојоно го изненадил Путин со изведба на песната „Среќен роденден“. Кинескиот претседател Си Ѓинпинг му подарил торта, додека тогашниот јапонски премиер Шинзо Абе му подарил саке.
И покрај ваквите исклучоци, родендените на Путин многу почесто биле поврзани со работни обврски отколку со одмор.
Портпаролот на Кремљ, Дмитриј Песков, во минатото изјавувал дека рускиот претседател практично не може да си дозволи да земе одмор. Роденденот често му поминува со државни активности, телефонски разговори и честитки од странски државници.
Приватниот дел од денот, според досегашните информации, Путин главно го поминува со семејството и блиските луѓе.
Слично било и минатата година, кога го одбележал својот 73-ти роденден. Наместо целосен одмор, тој имал закажана средба со постојаните членови на Советот за безбедност на Русија, а во текот на денот примал честитки и разговарал со странски лидери.
Интересна приказна низ годините претставуваат и роденденските подароци што ги добивал рускиот претседател. Меѓу нив имало најразлични предмети и симболични подароци, но и животни.
Според „Гардијан“, Путин добивал кученца, тигар од Усури, книги и вино. Еден од понеобичните подароци дошол од белорускиот претседател Александар Лукашенко, кој еднаш му подарил сертификат за трактор „Беларус“.
Така, низ годините неговите родендени се менувале од вообичаени работни денови со државни обврски, до необични патувања во сибирската природа, спортски настапи и средби со странски лидери, но 7 октомври најчесто останувал ден во кој државните обврски имале значајно место.
