Бројот на случаи на птичји грип во Германија драстично се зголеми во последните две недели, предупреди министерот за земјоделство Алојз Рајнер, повикувајќи на засилени заштитни мерки за да се сопре ширењето на вирусот.
„Моментално се соочуваме со многу жаришта, како кај дивите птици, така и на живинарските фарми“, истакна Рајнер, додавајќи дека, иако ова не е необично за ова време од годината, темпото со кое се шири инфекцијата е алармантно. Тој нагласи дека е неопходна координирана акција за да се спречи понатамошно ширење на вирусот.
Само во близина на Берлин се пронајдени повеќе од илјада мртви жерави, а истражителите веруваат дека птичјиот грип е причина за нивната смрт. Дополнително, Министерството за земјоделство на сојузната покраина Баден-Виртемберг вчера соопшти дека околу 15.000 птици ќе бидат убиени на живинарска фарма во Елинген како превентивна мерка за да се заштити останатиот добиток.
Птичјиот грип е високо заразна болест која често е фатална за птиците и живината, но засега не претставува опасност за луѓето. Министерот Рајнер нагласи дека главниот приоритет е да се заштитат животните, да се минимизираат економските штети во земјоделството и прехранбената индустрија и да се спречи понатамошно ширење на вирусот.
Не дознавај последен- читај ПРВ.мк
