Необична сатирична скулптура на американскиот претседател Доналд Трамп е изложена во зградата на Европскиот парламент во Стразбур, привлекувајќи големо внимание со начинот на кој е прикажан американскиот лидер.
Станува збор за дело на данскиот уметник Јенс Галшиот, високо околу два и пол метри, кое го прикажува Трамп гол и обложен со 23-каратно злато, седнат врз рамениците на значително помал човек и со палка за голф.
Скулптурата го носи името „Портокаловата чума“, а позната е и како „Кралот на неправдата“.
Со делото, авторот упатува критика кон политиките на Трамп, особено неговиот пристап кон климатските промени. Човекот под него симболично е прикажан како едвај го поднесува товарот.
Покрај скулптурата е поставено и објаснување во кое „Кралот“ вели дека би направил сè за да му помогне на човекот под него – освен да му се симне од грбот.
Поставувањето на делото во Европскиот парламент го организирал данскиот европратеник Пер Клаусен, кој изјавил дека не е загрижен од можната реакција на американскиот претседател.
Скулптурата е поставена во преминот меѓу две згради на Европскиот парламент и треба да остане изложена до четврток.
Делото не е првпат прикажано пред меѓународна публика. Претходно било изложувано и на други локации, меѓу кои и за време на климатската конференција COP30 во Бразил.
Трамп засега јавно не ја коментирал скулптурата.
