По повеќе од еден век на дното на Егејското Море, нуркачки тим конечно успеа да извлече вредни артефакти од потонатиот брод ХМХС Британик, сестринскиот брод на легендарниот Титаник. Британик, кој бил користен како болнички брод за време на Првата светска војна, потонал во 1916 година откако удрил на германска мина во близина на грчкиот остров Кеа.
Грчкото Министерство за култура потврди дека акцијата се одвивала под крајно опасни услови, со силни подводни струи и ограничена видливост. Иако нуркањето било извршено во мај, резултатите се објавени дури сега поради сложениот процес на конзервација на предметите.
Експедицијата, организирана од британскиот историчар Сајмон Милс и Фондацијата „Британик“, вклучувала 11 професионални нуркачи кои со специјализирана опрема стигнале на длабочина од 120 метри.
Извлечени артефакти:
- Ѕвоно од палубата за набљудување
- Навигациска светилка
- Двоглед за патници
- Керамички плочки од турска бања
- Посребрени послужавници од прва класа
- Порцелански мијалник од втора класа
Од Министерството информираат дека некои од другите артефакти биле преголемо оштетени и не можеле да се спасат.
Извлечените предмети ќе бидат изложени во нов подводен музеј во Атина, кој се очекува да стане атракција за туристи, љубители на историјата и подводната археологија.
Откритието претставува значаен културен и историски момент, особено за морската историја поврзана со фамозните бродови на компанијата White Star Line.
