Унгарскиот премиер Виктор Орбан денес изјави дека, според јавните проценки, на Украина ѝ се потребни околу 400 милијарди американски долари за да ја продолжи војната со Русија во следните четири години – и дека Европската Унија се очекува да ја покрие таа огромна сметка.
Сепак, Орбан нагласи дека „не е работа на Унгарија да ја финансира Украина“, иако неговата држава е членка на ЕУ.
„Освен Европската Унија, нема никој друг кој е спремен да ги покрие трошоците. Затоа Брисел е толку вознемирен. Сакаат да запленат замрзнати руски средства, да го ревидираат системот на финансирање на ЕУ и да земат нови заеми. Ние тоа го одбиваме. Не е работа на Унгарија да ја финансира Украина – немаме причина за тоа, ниту политички, ниту економски, ниту морално. Не сме единствени во Европа што го мислат тоа, но ние сме најгласни. Затоа Брисел постојано нѐ напаѓа,“ изјави Орбан, пренесува МТИ.
Премиерот на Унгарија го искористи германскиот израз „jawohl влада“, за да опише како, според него, Европската Унија сака земји кои само се согласуваат со нејзините политики.
„Тие сакаат ‘jawohl влада’ – влада што ќе вели ‘разбирам’ на секоја наредба, со канцеларија на европскиот јавен обвинител, економска политика во согласност со ЕУ, експерти одобрени од Брисел и премиер кој можат да го контролираат,“ рече Орбан.
Во својот говор, тој најави дека во следните четири години, унгарската влада ќе се фокусира на поддршка на семејствата, фирмите и пензионерите.
Планот вклучува ослободување од данок за мајките со две или три деца и враќање на 14-тата пензија – мерки со кои Орбан порача дека парите на унгарските граѓани ќе останат во земјата.
„Не можеме да дозволиме унгарски пари да се испраќаат во Украина. Наш приоритет е благосостојбата на унгарските семејства,“ заклучи Орбан.
