Македонците кои живеат и работат во Германија, како и милиони други вработени во оваа земја, би можеле да се соочат со значајни промени доколку германската влада ги прифати препораките на Пензиската комисија, која предложи пакет од 30 мерки за реформа на пензискиот систем.
Една од најголемите промени предвидува укинување на две добро познати поволности што со години ги користат работниците – системот на мини-работни места и можноста за предвремено пензионирање на 63-годишна возраст, позната како „Ренте 63“.
Предлогот вклучува и постепено продолжување на работниот век. Според препораките, старосната граница за задолжително пензионирање најпрво би се зголемила на 69 години, а во подоцнежна фаза би можела да достигне и 70 години. Образложението е дека Германија се соочува со демографски предизвици, сè поголем број пензионери и потреба од обезбедување долгорочна стабилност на пензискиот систем.
Дополнително, мини-работните места би го изгубиле својот досегашен посебен статус. Тоа значи дека најголем дел од лицата кои работат преку овој систем би морале да почнат да плаќаат придонеси за пензиско и социјално осигурување, што директно би влијаело врз нивните месечни примања.
Во моментов, мини-работата овозможува месечна заработка до 603 евра, при што работниците уживаат значителни поволности и многу мали одбитоци, поради што нето и бруто платата се речиси идентични. Токму ова ја направи оваа форма на вработување исклучително популарна кај оние кои сакаат дополнителен приход или работат со скратено работно време.
Според предложените измени, исклучок би имало само за студентите. Тие и понатаму би можеле да работат преку системот на мини-работни места без дополнителни придонеси, но само доколку нивната месечна заработка не надминува 603 евра.
Најсилно погодени би биле вработените во трговијата, угостителството, приватните домаќинства, како и голем број лица кои работат со скратено работно време, меѓу кои има и многу жени. За нив, реформата би можела да значи намалување на месечниот приход поради новите обврски за плаќање придонеси.
Од друга страна, поддржувачите на реформите сметаат дека иако работниците краткорочно би добивале помали примања, на долг рок би имале поголема корист бидејќи би стекнале повисоки индивидуални пензиски права и посигурна пензија во иднина.
Германските медиуми, пак, предупредуваат дека ваквите промени би можеле да предизвикаат и несакани последици. Постои стравување дека дел од работодавците и работниците би можеле да се префрлат во сивата економија, односно непријавена работа, особено во секторите како угостителството и домашните услуги.
Во моментов повеќе од пет милиони луѓе во Германија работат преку системот на мини-работни места, па евентуалното усвојување на реформата би претставувало една од најголемите промени на германскиот пазар на труд во последните години.
Со цел да се зајакне пензискиот фонд, предлогот предвидува воведување задолжително плаќање придонеси и за категории работници кои досега биле ослободени од оваа обврска. Сепак, државните службеници, познати како „Беамте“, засега не се опфатени со овие измени.
Предвидени се и промени во начинот на финансирање на пензискиот систем. Дел од средствата што се издвојуваат за пензии би се инвестирале на пазарот на капитал, односно на берзата, со цел да создадат дополнителен финансиски амортизер. Во почетната фаза е предвидено еден процентен поен од придонесите да се насочува кон вакви инвестиции, при што товарот рамноправно би го делеле работодавачите и вработените. Во следната фаза, овој удел би се зголемил на два процентни поени.
Од 2031 година е предвидено повторно воведување и на таканаречениот „фактор на одржливост“ (Nachhaltigkeitsfaktor), механизам кој директно го поврзува растот на пензиите со бројот на луѓе што уплаќаат придонеси во системот.
Во пракса, тоа би значело дека идните пензии би растеле со побавно темпо, бидејќи нивното зголемување ќе зависи од состојбата на пазарот на труд и бројот на активни осигуреници, со цел системот да остане финансиски одржлив и во иднина.
Во овој момент, станува збор за препораки на германската Пензиска комисија, а конечната одлука дали овие мерки ќе станат дел од законските измени ќе ја донесат германските власти во наредниот период. Се очекува предлозите официјално да бидат доставени до федералниот канцелар и до Министерството за труд, по што ќе следува нивно разгледување и евентуална законска процедура.
