Американскиот претседател Доналд Трамп ја отпушти новата портпаролка на Белата куќа, Кејти Захарија, по само пет дена на функцијата, со што нејзиниот мандат стана еден од најкратките во историјата на американската администрација.
Одлуката ја потврдиле советници на претседателот, откако Захарија се соочила со бројни критики поради своите јавни настапи и прашањата околу професионалните квалификации.
Трамп претходно изјавил дека лично ја советувал да размисли дали оваа работа навистина е за неа.
„Можеби оваа функција не е за неа“, изјавил американскиот претседател, додавајќи дека медиумите биле неправедни кон неговата соработничка.
Проблемите започнале уште на нејзината прва официјална прес-конференција, кога одговорила на само три новинарски прашања.
Дополнителни контроверзии предизвикало откритието дека Захарија никогаш не го положила правосудниот испит, иако Трамп претходно ја претставил како адвокатка.
Таа подоцна во телевизиско интервју признала дека нема положено правосуден испит.
Според американските медиуми, нејзините настапи и реакциите на советниците придонеле претседателот да ја преиспита одлуката за назначувањето.
И покрај разрешувањето, Трамп продолжил јавно да ја пофалува како лојална поддржувачка, а било најавено и дека таа и нејзиното семејство ќе вечераат со потпретседателот Џеј Ди Венс.
Нејзиниот петдневен мандат привлече внимание и поради споредбите со Ентони Скарамучи, кој во 2017 година остана само десетина дена на позицијата директор за комуникации во Белата куќа.
Со заминувањето на Захарија, Белата куќа повторно останува пред задачата да избере нов главен портпарол.
