Американскиот авион за радарски надзор и командување E-3 Sentry AWACS е оштетен во ракетен и напад со беспилотни летала врз воздушната база Принц Султан на 27 март, при што се ранети повеќе од десет американски војници, од кои двајца потешко.
Според достапните информации, во нападот биле погодени и авиони за дополнување гориво во воздух, што дополнително ја усложнува оперативната состојба на Вооружените сили на САД во регионот.
Американското Централно командување засега не го коментира инцидентот, додека објавените фотографии што кружат во јавноста укажуваат на сериозни оштетувања, иако тие не се независно потврдени.
Авионот E-3 AWACS има клучна улога во модерните воени операции – овозможува радарски надзор, координација на воздушниот простор и управување со борбени дејствија. Овие летала се користат со децении во конфликти како Заливската војна, како и во операции во Ирак, Авганистан и други.
Аналитичарите предупредуваат дека евентуалното губење на ваков авион може значително да ја намали способноста за следење на ситуацијата на бојното поле и да создаде „слепи точки“ во воздушниот надзор, со што се намалува координацијата на воените операции.
Воените експерти посочуваат дека овие летала се клучни за целокупната слика на бојното поле – од избегнување судири до прецизно насочување на операции.
Нападот се толкува како дел од поширока стратегија на Иран за таргетирање на елементи на американската воздушна надмоќ, вклучително комуникациски системи, радарски капацитети и поддржувачка авијација.
Со оглед дека флотата на вакви авиони е ограничена и делумно застарена, евентуалната загуба дополнително го зголемува притисокот врз преостанатите ресурси, додека се чека воведување на нова генерација системи.
Извор: Скопје1.мк
