Во текот на изминатите 24 часа, најмалку 60 лица го загубиле животот во серија израелски напади низ Појасот Газа, соопшти Министерството за здравство на палестинската енклава, пренесува агенцијата Associated Press. Меѓу жртвите се и 10 лица убиени во јужниот град Кан Јунис.
Израел продолжува со својата воена офанзива врз палестинската територија, дозволувајќи истовремено само минимален проток на хуманитарна помош. Ова се случува во услови на сериозна хуманитарна криза, со оглед на тоа што Газа е под строга израелска блокада веќе речиси три месеци.
Меѓународната заедница сè погласно ја критикува израелската воена кампања и бара зголемен пристап на хуманитарните организации до загрозеното население. Експерти предупредуваат дека повеќе од два милиони жители на Газа се изложени на сериозен ризик од глад и недостиг на основни животни услови.
Загриженост во врска со влошената хуманитарна состојба изразија и Соединетите Американски Држави, досегашен клучен сојузник на Израел, повикувајќи на итни мерки за спречување на понатамошно влошување на ситуацијата.
